Irratiaren ibilbide luzean momentu ederrez gain zailtasunak ere izan dira, Nafarroako Gobernuak diru-laguntzak bertan behera utzi zituenekoa kasu. Gorabehera guztien gainetik, baina, lortu du tokiko irrati txiki euskaldunak aurrera egitea, eta hasierako helburu berberak mantentzen ditu egun: Ultzama aldeko eskualde zabalean euskara bultzatzea eta herritarren arteko harremanak sustatzea. Urteurrenari begira, hiru ekimen eder prestatu ditugu irailerako eta urrirako. Hona hemen egitaraua!
- Irailaren 23an: JAZZTATU! jazz ibiltaria Imotzen, Basaburuan eta Ultzaman barna. Omen kolektiboak DarDar proiektua aurkeztuko du. Zuzeneko jazz musika eskualdeko ostatu desberdinetako terrazetan, bermut garaia girotzeko.
- Urriaren 7an: BERTSO SAIO MUSIKATUA, Santurbe baselizaren atarian (Odietan), 12:00etan. Bertsolariak: MAIALEN LUJANBIO, NEREA IBARZABAL eta JULIO SOTO. Musikariak: Ixak Arruti eta Gari Otamendi
- Urriaren 21ean: 25. URTEURREN PESTA! Eritzegoitiko (Atetz) Kultur Eskolan, egun osoko egitaraua: puzgarriak, herri kirolak, dantzak, bazkaria, La Jodedera taldearen kontzertua, DJ Hannibal Selekter...
Horretaz guztiaz gain, irratiaren ibilbidea jasoko duen dokumentala prestatzen ere ari gara. Aurrerago emanen dugu honen berri, dena den...
