Abenduaren 10ean, eguerdiko 12:0etan emanen diote hasiera egunari, Luzia Goñi Kultur Etxearen izendatzearekin. Segidan, Luzia Goñiren bertso musikatuak izanen dira, Joana Ziganda eta Ekain Alegre bertsolarien eskutik. 14:00etan, herri bazkari berezia izanen da, izan ere, Goñi, ogibidez sukaldaria zen, eta bere ohiko errezeta batzuk prestatuko dituzte. Sarrerak eskuratzeko, 660 97 04 06 telefonora deitu edo idatzi behar da. 16:15ean bideo proiekzioa izanen da, eta bukatzeko, 16:30ean, punta-puntako bertso saioa: Maialen Lujanbio, Alazne Untxalo eta Saioa Alkaiza arituko dira.
Aurreko egunetan, gainera, Aizarozko gazteek mural bat margotuko dute herrian bertsolariaren omenez. Basaburuko Basandereok taldeak eta Luziaren familiak elkarlanean antolatu dute eguna, Basaburuko Udalaren babesarekin.
