Pediatra falta salatu du Ultzamako Udalak

Amezti.eus 2024ko uzt. 8a, 10:14

Ekainetik Ultzamaldeko oinarrizko osasun-eremuko pediatra postua hutsik dagoela jakinarazi du Ultzamako Udalak zabaldu berri duen oharrean. Ultzaman, Anuen, Basaburuan eta Odietan ematen zuen zerbitzua pediatrak, baina orain arte bertan aritu den langilea lanpostuz aldatu eta hutsik gelditu da haren plaza.

Ultzamako Udalak jakinarazi duenez, osasun-zentroarekin eta iparraldeko zuzendariordearekin harremanetan daude gaiaren inguruan informazioa jasotzeko eta lanpostua lehenbailehen betetzen saiatzeko. Momentuz, pediatria zerbitzua behar duten erabiltzaileei familiako medikuak arreta presentziala emanen diela jakinarazi dute, bailara bakoitzari dagokion osasun-etxean. Espezialista beharrezkoa den kasuetan, berriz, San Martín Doktorea zentrora bidaliko dituzte erabiltzaileak.

Oharrean nabarmendu dutenez, garrantzitsua da Ultzama aldeko bailaretan eta oro har landa-eremuan kalitatezko zerbitzu publikoak mantentzea. Horretarako lanean segituko dutela ohartarazi du Udalak.