Ultzama aldeko zazpi udalerrietan egon diren Espainiako kongresurako hauteskundeetako emaitzak jaso ditugu artikulu honetan. Guztira, EH Bilduk 824 boz jaso ditu eskualde zabalean, eta PSNk, berriz, 354. Alderdi independentistak bikoiztu egin ditu bigarren postuan gelditu diren sozialisten bozak, eta, gainera, zazpi udalerrietan lortu du alderdirik bozkatuena izatea.
UPN gelditu da eskualdean hirugarren postuan, 280 bozekin; eta PP eta Sumarrek boz kopuru berbera lortu dituzte Ultzama aldean: 245. Uda betean ospatu diren lehen hauteskunde hauetan, abstentzioa ere kontuan hartzeko modukoa izan da. Batez beste, %30,91 puntukoa izan da eskualdeko abstentzioa. Datuak herriz herri aztertuko ditugu behean.
Imotz
EH Bilduk jaso du boz kopuru handiena, 88 guztira. Sumarrek eta PSNk 39na boz jaso dituzte; eta PPk, Geroa Baik eta UPNk 20 bozeko berdinketa izan dute. Abstentzioa, udalerri honetan, %31,21 puntukoa izan da.
Basaburua
Basaburuan ere EH Bilduk jaso ditu boz gehien, diferentzia handiarekin gainera: 286 boz jaso ditu alderdi independentistak, eta bigarren postuan gelditu den PSNk, berriz, 52. Abstentzioa, kasu honetan, %30,72 puntukoa izan da.
Ultzama
Ultzaman, EH Bilduk 236 boz jaso ditu, bigarren postuan gelditu den PSNk 148 lortu dituen bitartean. UPN hirugarren postuan gelditu da, 129 boz jasota. Abstenzioa eskualdeko handiena izan da Ultzaman, %38,54 punturekin.
Atetz
Atetzen aldea estuagoa izan arren, hemen ere EH Bildu izan da garaile. 41 boz jaso ditu alderdi independentistak, eta bigarren postuan gelditu den PPk, berriz, 32. Abstentzioa eskualdeko baxuena izan da Atetzen, %25,40 puntukoa.
Odieta
Odietan, EH Bilduk 71 boz jaso ditu, eta segidan, tarte oso txikiarekin, PSN (32 boz), UPN (31 boz) eta Sumar (29 boz) gelditu dira. Abstentzioa %31,81 puntukoa izan da bertan.
Anue
EH Bilduk 79 boz jaso ditu Anuen; PSNk 42; PPk 38 eta UPNk 35. Abstentzioa, %32,81 puntukoa izan da.
Lantz
Lantzen ere EH Bildu izan da lehen indarra, 23 boz jasota. UPNk segitu dio, 15 bozekin; eta PSN izan da hirugarren, 14 bozekin. Abstentzioa, beste udalerri gehienekin alderatuta, baxuagoa izan da Lantzen ere: %25,86 puntukoa, hain zuzen.
*Grafikoen iturria: Berria.eus