22. Korrika

Korrikak gure eskualdean utzitako irudiak

Goizeko 9:30ean eskualdean sartu, eta 13:00etan, Beruete atzean utzi eta Larraunerako bidea hartu zuen, atzo 22. korrikak. Hemen dituzue goizak utzi zituen irudi ederrak.

Korrikako 1214. kilometrotik hasita, 30 kilometro egin zituen gurean. Almondoztik heldu zen, Arraitzerako bidean, eta Alkotz, Iraizotz, Larraintzar, Auza, Erbiti, Gartzaron, Jauntsarats eta Beruete igaro zituen.

30 kilometro horietan 44 erakundek erosi zituzten kilometroak elkarte, herri talde, kontzeju, udal eta enpresen artean.

Furgonetan Leire Etxeberria iraizoztarrak animatu zituen korrikalariak, eta baita korrika egin ere, Iraizozko kontzejuak hartutako kilometroan. Eta, hain zuzen ere, Iraizoztik Larraintzarrerako bidean, Lizasoko kontzejuko kideak eta herritarrak, Larraintzarkoak, ikastetxeko ikasle eta irakasleak batu ziren, eta, horregatik, jende ilara luzeen sortu zen ibilbideko zati horretan.

Orokorrean, emozio handiz bizi izan du eskualdeak 22. korrika. Donostiara iritsiko da igandean, apirilaren 10ean, urte bateko atzerapenarengatik bereziki espero zen edizioari amaiera emanez.