Denboraldi berria hasi du BRT Menditarrak taldeak

Amezti.eus 2021ko ira. 8a, 10:59

Azken urteetan jokalari faltagatik arriskuan egon da BRT Baztango Rugby Taldearen etorkizuna, eta aurtengoan ere zailtasunak izan dituzten arren, azkenean lortu dute taldea aurrera ateratzeko nahikoa jokalari biltzea. Ultzama aldeko errugbizale askok jokatzen dute Baztango taldean.

Senior eta sub-18 (2004-2005) mailetako taldeak dira aurrera atera direnak, eta honezkero ekin diote aurredenboraldiari. Iñaki Ezkurra entrenatzailearen gidaritzapean eginen dute aurtengo denboraldia.

Entrenamenduekin hasiak egon arren, jokalari berriei ateak zabalik dituztela jakinarazi eta probatzeko gonbidapena egin die taldeak. Asteazken edo ostiraletan arratsaldeko 20:00etan Lekarozko errugbi zelaira hurbildu edo 638 445 513 (Ander) zenbakira deitu dezakete interesa dutenek. "Errugbia ikastea eta jokalarien arteko giro ona bermatuta daude, beraz, ez izan lotsarik errugbiaz gozatzeko", diote zabaldutako oharrean.