Álvarez Asturiasen jaio zen, gaztetan Hernanira joan zen, bertan maitemindu eta 3 hilabetetan ikasi zuen euskaraz hitz egiten. Ondoren, bere bigarren maitasunak, sagardotegi lanak, Berueteko Txaseneko Borda martxan jartzera bultzatu zion. Kupelak, itxura, txuletak erretzeko parrila eta sukaldea goraipatu dute bere lehiakideek.
Bigarren postua Maritxu Erbitik daraman Etxalekuko Ostatuak irabazi du. Harriz eta egurrez egindako jantoki ederra, eta bikain antolatua duen sukaldea nabarmendu dute. Bertan, gainera, oiloak eta poniak ditu Erbitik, umeek asko atsegin dituztelako. Han egiten duen bazkari tradizionalak, baratzekoa, eta, bereziki, mamiak, puntu ugari lortzeko aukera eman dizkio.
Hirugarrena, Aizarozko Ostatua izan da, Ana Irigoyenek kudeatzen duena. Txikia izan arren, sukaldea zoragarri prestatua duela esan dute gainontzekoek, eta umeentzako duen txokoa ere asko erakarri ditu. Irigoyenek aniztasun funtzionala duten pertsonendako zentru batean lan egin zuen 15 urtez, baina aldaketa sakona behar zuelako Ostatua hartzea erabaki zuen. Bizitzan hartutako erabaki onena dela azpimarratu du telebista saioan.
Laugarrena, baina besteok aitortu dutenez, ez galtzailea, Aldazko Inaxio Begiristain izan da. Programan ipini diren puntuaziorik hoberenak jarri dituela nabarmendu du Javi Sierra aurkezleak, bere adiskidetasunarengatik eskerrak emanez, “Estrategia gutxien erabili den saioa izan da gaurkoa, adiskidetasuna izugarria izan da, horregatik, bihotz-bihotzez mila esker lau lehiakideei”, hitz horiekin agurra eman dizkie guztiei.