"Azken egunetan egin duen euriarekin, iaz baino askoz hobe gaude, belarra ere geihago dago. Hegoalderago ere eskertu da euria, Lizarraldean eta, baina zerealentzat-eta berandu izanen dela pentsatzen dut. Hemen, Iruñea inguruan, hor bai dago uzta ona, Iruñetik behera egoera txarra da", azaldu du Azpirotzek.
Azpimarratu duenez, iazko eta aurtengo lehorteak aziendarendako bazka falta ekarri du, eta horrek bestelako arazoak ere sortu ditu. "Hiltegiak kolapsatuak daude Espainiako estatuan, jendea animaliak kentzen ari baita elikatu ezin dituelako. Itxaron zerrendak daude hiltegietan, eta, aldi berean, espekulazio handia ari da sortzen janariarekin, pentsuarekin eta forrajearekin", gehitu du.
Makroetxaldeen gaia, pil-pilean
Makroetxaldeen inguruko artikulo bat eta industriaren hedapenaren inguruko beste bat ere ekarri dizkigu Azpirotzek, Sustrai Erakuntzak ateratakoa, lehenengoa; eta, Ekologistak Martxan, bigarrengoa. Bertan, Nafarroako zenbait abeltzainek abeltzaintza industrialaren zabalkundea salatu dute. "Nafarroan indar handiarekin ari da gertatzen abeltziantza industrialaren zabalpen hori, bereziki Erribeheran eta Nafarroa erdialdean, eta batez ere txerri granjena". Abeltzain txikiak zuzenean kaltetzen ditu eredu horrek, artzainak azaldu digunez. "Gainera, ez dituzte ingurumen neurri asko betetzen, baina ez zaie ezer gertatzen", amaitu du.