Nafarroako hirugarren mailako finala izan zen Arantzan, joan zen abuztuaren 15ean, eta Olagueko Beñat Senosiain aizkolari gazteak eraman zuen txapela. San Ferminetako kanporaketan erabaki bezala, Senosiainekin batera lau aizkolari gehiago aritu ziren, eta bi kanaerdiko eta bi 45 ontzako moztu behar izan zituzten. Olaguearrak 11'07ko marka egin zuen Julen Urrutia arraioztarra bigarren postuan utziz. Biak pasa dira bigarren mailara.
Sailkapena:
- Beñat Senosiain (Olague): 11.07
- Julen Urrutia (Arraioz): 11.21
- Ioan Goikoetxea (Etxarri Aranatz): 15.00
- Eñaut Oiarbide (Etxarri Aranatz): 15.09
- Xabier Mitxelena (Irurita): 15.15
Beñat Senosiainek azaldu digun bezala, lehenengo bi sailkatuen artean egotea zen helburua, bigarren mailara igotzeko. Azkenea, txapela lortzeko lehian ere sartu eta irabazi zuen: "Hasieratik oso ongi ikusi nuen neure burua eta enborrak aurrera, gainera, aitak oso ongi nenbilela erraten zidan, lehenengo eta bigarren postuan borrokan. Behin garaipena eskuratu nuela oso pozik hartu nuen". Aitor Senosiain aizkolari oiha du aita, txiki txikitatik aizkoran erakutsi eta lagundu dio. "Beti aritzen naiz etxean entrenatzen baina ez dakizu plazan nola ibiliko zaren. Honek erakusten dit etxeko entrenamenduetan ongi ari garela eta plazan nire maila emateko gai izan naizela. Hori da egin beharrekoa, etxean erakusten duzun maila plazan ere erakustea”, azaldu digu gazteak.
Nafarroako III. mailako txapelduna dugu, beraz. Joan zen urtezahar egunean, Asteasun, Urrezko Aizkoraren aurretik jokatutako binakako gazteen txapelketan ere garaipena lortu zuen Igoin Pikabearekin batera. Hurrengo erronka urriaren 26an izanen du, Balmasedan, Euskal Herriko gazteen txapelketa, eta horretarako prestatzen arituko da hemendik aurrera. Tartean, esan digunez, erakustaldiak ere eskaintzeko aukera izatea espero du: "Horiek ere asko laguntzen bainaute jendearen aurrean aritzen zarenean agertzen den urduritasun hori kudeatzen".
Aita aizkolari, bost urterekin oparitu zion bere lehenengo aizkora Beñat Senosiain Bikuña olaguearrari. Duela hiru urte debutatu zuen, Anueko eguneko erakustaldian, etxean.
